РУШДИ ҲАМКОРИҲОИ БАЙНАЛМИЛАЛИИ ИНСТИТУТ: ОҒОЗИ ШАРИКИИ СТРАТЕГӢ БО ДОНИШГОҲИ АНҲОЛТИ ОЛМОН
01 ноябри соли 2025 вохӯрии кории роҳбарияти Институти илмию тадқиқотии рушди устувор ва иқтисоди сабзи Донишгоҳи байналмилалии сайёҳӣ ва соҳибкории Тоҷикистон бо намояндагони Донишгоҳи Анҳолти Олмон баргузор гардид. Дар ҳайати меҳмонон муовини президент оид ба илм ва рушди устувор профессор Маркус Ҳолс, директори барномаҳои MBA профессор Корнелия Скотт, ҳамчунин директори Маркази байналмилалии таҳқиқоти бозорҳои молиявӣ ва ҷамъияти “Илм бидуни марз” профессор Татяна Никитина иштирок доштанд.
Зимни вохӯрӣ ҷонибҳо масъалаҳои марбут ба густариши ҳамкориҳои илмию таҳқиқотӣ, таҳия ва татбиқи лоиҳаҳои муштарак дар самтҳои рушди устувор, менеҷменти сабз, инчунин ташкили чорабиниҳои муштараки илмӣ, форумҳо ва конфронсҳои байналмилалиро мавриди баррасӣ қарор доданд.
Дар анҷоми вохӯрии корӣ байни Институти илмию тадқиқотии рушди устувор ва иқтисоди сабзи Донишгоҳи байналмилалии сайёҳӣ ва соҳибкории Тоҷикистон ва Донишгоҳи Анҳолти Олмон, ҳамчунин ҷамъияти “Илм бидуни марз” созишномаи ҳамкорӣ ба имзо расонида шуд. Дар доираи ин ҳамкорӣ, лоиҳаи харитаи роҳ барои соли 2026 баррасӣ ва самтҳои афзалиятноки ҳамкории илмӣ ва инноватсионӣ муайян гардиданд.
